ഒളിഞ്ഞുനോട്ടം

 ഒളിഞ്ഞുനോട്ടം


വീട്ടുമുറ്റത്തെ ഹൃദയ വള്ളിക്കുടിലിൽ
രണ്ടു കുരുവികൾ കൂടുകൂട്ടുന്നു

ചകിരിനാരുകൾ കോർത്ത്
വാഴനാരുകൾ നിരത്തി
മനോഹരമായി അവർ
കൂട് മെനയുന്നത് ഞാൻ നോക്കിനിന്നു


എൻറെ നോട്ടം പലപ്പോഴും അവനെ അലോസരപ്പെടുത്തി
അവളുടെ കണ്ണുകളിൽ ആകട്ടെ
ഭയം നിഴലിട്ടു.

എങ്കിലും എൻറെ ആകാംക്ഷയ്ക്ക്
ഒരു കുറവുമുണ്ടായില്ല,

ജാലക വാതിൽ പാതിതുറന്ന്
അതിന്റെ പിന്നിൽ മറഞ്ഞിരുന്ന്
മിഴിയെറിയുന്നത് പതിവായപ്പോൾ
അവർ കൂട്ടിൽ ചേക്കേറാതെയായി.

- ഏ ആർ രാജേഷ് അതിരമ്പുഴ