നിനക്കായൊരു പ്രാർത്ഥന

ഇന്നും നിനക്കായി പ്രാർത്ഥിച്ചൂ മമ സഖീ

കണ്ണനതുകേട്ടെ,ന്നുള്ളം പറയുന്നൂ

ഒന്നുംഉര ചെയ്തേയില്ല കണ്ണ, നെന്നാൽ

ചുണ്ടിൽ മൃദുസ്മിതം മിന്നീടുന്നൂ ചിരം

ഓടക്കുഴൽ വിളി അരികത്തണഞ്ഞീലാ..!

ഓമൽക്കുളിർമൊഴി കാതിലുണർന്നീലാ..!

തഴുകും തെന്നൽ പോലാം മധുരസ്മിതത്തിനാൽ

നിറയെ കാര്യങ്ങളെൻ കണ്ണനെന്നോടോതി..!!

യാചിച്ചില്ലാ തെല്ലും ധനവും പെരുമയും

കാതിൽപ്പതിക്കില്ലെന്നറിയാം അതിമോഹം

അതിലും അമൂല്യമാമളവറ്റൊരേ ധനം

നിനക്കായി ചോദിച്ചു ഞാൻ; ചിരിച്ചേ നില്പൂ കണ്ണൻ.

മിഴിയിൽ ജലമേതും നിറയാതിരിക്കുവാൻ

കരളിൽ കറുപ്പേതും കലരാതിരിക്കുവാൻ

തുടരുമീ യാത്രയിൽ, നിറയും സന്തോഷത്തിൻ

തിരയിൽ നീയേറുവാ,നിന്നും ധ്യാനിപ്പു ഞാൻ

അരികിൽ പ്രിയമെഴും സഖിമാർ നിനക്കെന്നും

തുണയായിരിക്കുവാൻ കനിഞ്ഞീടട്ടേ കണ്ണൻ

കനിയാതിരിക്കില്ല കരുണാമയൻ കാന്തൻ

മധുരം വഴിയുന്ന ചിരിയായി നിറയുന്നോൻ..!!

*****

സാധാരണക്കാരൻ

നികുതിയടക്കുവാനില്ല വരുമാനമെങ്കിലും

ഉപ്പിനും മുളകിനും കസ്തൂരി ഗുളികയ്ക്കും

കരമൊടുക്കുന്നവൻ..!

പദവിയും പണവും അകലെയെന്നാകിലും

 പാദസേവയ്ക്കു പണിപ്പെട്ടിടാത്തവൻ..!

ആന്ധ്യവും അധികാരഗർവവും

ആസനത്തിലെയാൽമരമെന്നപോൽ

കുടചൂടി നില്ക്കും ഭരണകൂടങ്ങൾ!

കുടിപ്പക പോക്കുവാൻ വെമ്പും കൊടിപ്പട

കാണുന്നതേയില്ല നോവുമാത്മാക്കളെ!?

പിന്നെയുമുയരുന്ന കൊടികളും

ദിക്കുഭേദിക്കുന്ന മുദ്രാവാക്യങ്ങളും അവനു വേണ്ടി

അവന്റെ വഴിയടച്ചു അവനു വഴി നേടുവാൻ സമരം

അവന്റെ കഞ്ഞി മുടക്കി അവന്റെ ദാരിദ്ര്യമൊടുക്കുവാൻ സമരം!!

അങ്ങനെ എന്തിനും ഏതിനും

സമരമുഖങ്ങളിൽ രക്തസാക്ഷിയാകുവാൻ

അവൻ സാധരണക്കാരൻ മാത്രം ...!

ഉണരുക സാധുജന്മങ്ങളേയുണരുക

ഇനിയൊരു മാറ്റത്തിന്റെ ചൂലെടുക്കുക

ഇത്തിരുമുറ്റത്തു ഭരണവും സമരവും പ്രതിരോധവും

ആഘോഷമാക്കുമീ

ചവറുകളൊന്നായടിച്ചു ദൂരേക്കെറിയുക..!!

  

ഒഴുക്കിനെതിരെ

അമ്മച്ചിറകിന്റെ ശാസനയേല്ക്കവേ

കുഞ്ഞുമീനല്പം കുറുമ്പോടെ ചൊദിച്ചു:

“എന്തിനൊഴുക്കിന്നെതിരേ നാം നീന്തണം?”

മന്ദസ്മിതം തൂകിയമ്മ ചൊല്ലുന്നു:

“എതിരെ നാം നീന്തിയാൽ

ഇര വായിലെത്തിടും!“

 ***